प्रहरीको ‘धर्म’मा अडिग डिएसपी भण्डारी

इटहरी । इलाका प्रहरी कार्यालय इटहरीको इञ्चार्जको जिम्मेवारी सम्हालेका प्रहरी नायव उपरिक्षक (डिएसपी) धर्मराज भण्डारी प्रहरी कर्ममा अब्बल मानिन्छन् । प्रहरीको व्यावसायीक ‘धर्म’मा अडिग रहेका उनले इटहरीको जिम्मेवारी पाउनासाथ पेन्डिङमा रहेका कतिपय प्रकरणको फाइल खुल्न सक्ने बताइसकेका छन् ।
डिएसपी भएपछि पहिलो पटक इञ्चार्जसीप लिएका भण्डारी यसअघि इन्स्पेक्टर हुँदा पनि इञ्चार्ज थिए । जहाँ उनले निक्कै सफलताका साथ काम गरिसकेका छन् । त्यसबेला दाङको ईलाका प्रहरी कार्यालय भालुवाङ, ईलाका प्रहरी कार्यालय लुम्बिनी रुपन्देही, महानगरीय प्रहरी प्रभाग कोटेश्वर काठमाडौंमा रहेर काम गरेका थिए ।
‘पूर्वमा पहिलो पटक आएको हुँ । यहाँको अवस्था जानकारी लिने क्रममा छु । जटिल रहेका र खोजीनीति हुन बाँकी रहेका मुद्दालाई पनि अध्ययन गरिरहेको छु’, भण्डारी भन्छन्,‘जनताको चासो र चर्चामा रहेका न्याय नपाएका कतिपय मुद्दालाई अनुसन्धान गर्न सकिए फाइल पल्टाउने योजना पनि छ ।’
भण्डारीले जिम्मेवारी पाएका प्रायः सबै ठाउँमा प्रभावकारीताका साथ काम गरेका छन् । इटहरी निक्कै जटिल ठाउँ रहेका कारणले नै प्रहरी महानिरिक्षक (आईजी) सर्वेन्द्र खनालले भण्डारीलाई यहाँ पठाएको चर्चा छ ।
जिल्ला प्रहरी कार्यालय दाङ, महानगरीय प्रहरी बृत कालीमाटी, जिल्ला प्रहरी कार्यालय बारा, महानगरीय प्रहरी बृत्त महाराजगन्ज, जिल्ला प्रहरी कार्यालय सल्यान, जिल्ला प्रहरी कार्यालय रुपन्देहीमा कुशलताका साथ काम गरेका भण्डारीले कार्यकौशलता प्रस्तुत गर्ने प्रहरीमा चर्चा छ ।
दाङ, बारा र रुपन्देही मा रहदा दर्जनौं जटिल मुद्दाको सफल अनुसन्धान गर्न सफल भण्डारी हालका आइजी सर्वेन्द्र खनाल नारायणी अञ्चलको प्रहरी प्रमुख हुँदा उनी जिल्ला प्रहरी कार्यालय बारामा थिए । प्रहरी महानिरिक्षक सचिवालयका एक अधिकारी भन्छन्,‘आईजी खनालको स्पिरिटमा काम गर्न सक्ने दक्षता उनमा रहेका कारण नै इटहरीको जिम्मेवारी पाएका हुन् ।’
इटहरीको पोस्टिङ् पाउन प्रहरी अधिकारीहरुको चर्को चलखेल हुन्छ । नेताकोमा धाउनेसम्म हुन्छ । तर डीएसपी भण्डारी व्यावसायीक अधिकृत भएकोले सुरक्षा चुनौती र अपराधको ट्रेण्डको गाम्भियर्तालाई मध्यनजर गरेर आइजी खनालले इटहरीको जिम्मेवारी दिएको प्रहरी मुख्यालयमा चर्चा छ ।
डिएसपी बढुवा भएपछी संयुक्त राष्ट्रसंघीय मिसन अन्तर्गत सुडान गएका उनी पछिल्लो समय जिल्ला प्रहरी कार्यालय रुपन्देहीमा कार्यरत थिए । रुपन्देहीमा कार्यरत रहदा उनको नेतृत्वमा सयौं जटिल मुद्दाको सफल अनुसन्धान भएको थियो ।
‘संगठनको जिम्मेवारी र अपराध अनुसन्धान हाम्रो कर्तव्य नै हो’, भण्डारी भन्छन्,‘संगठनले खटाएको ठाउँमा काम गर्नु, सकेसम्मको इफोर्ट लगाउनु मेरो धर्म पनि हो ।
हाम्रो पुलिसबाट साभार