कर्णालीका प्रत्येक जिल्लाले एक/एक करोड पाउने


सुर्खेत – कर्णाली प्रदेश सरकारले कर्णालीका प्रत्येक जिल्ला लाई एक/ एक करोड रुपैयाँ उपलब्ध गराउने भएको छ ।
कोरोना रोकथाम तथा नियन्त्रण र उपचारका लागि प्रत्येक जिल्लालाई एक/एक करोड रुपैयाँ दिने कर्णाली सरकारले निणर्य गरेको छ ।
सोमवार बसेको मन्त्रिपरिषद्को बैठकले प्रत्येक जिल्लामा एक/एक करोड रुपैयाँ तत्काल उपलब्ध गराउने निणर्य गरेको हो ।
सरकारका प्रवक्ता एवं आर्थिक मामिला तथा योजना मन्त्री विमला केसीका अनुसार कर्णालीका जिल्लाहरुमा अक्सिजन सिलिन्डर, अक्सिजन आपूर्तिलगायतका समस्या समधानका लागि एक करोड रुपैयाँ उपलब्ध गराउने निणर्य गरेको छ ।
प्रत्येक जिल्लामा एक/एक करोड, प्रदेश अस्पताल सुर्खेत, चौरजहारी अस्पताल रुकुमपश्चिम र कर्णाली स्वास्थ्य विज्ञान प्रतिष्ठान जुम्लालाई एक/एक करोड तथा मेहेकुना अस्पताल सुर्खेत र दैलेख अस्पतालमा ५०/५० लाख रुपैयाँ पठाउने निणर्य भएको मन्त्री केसीले जानकारी दिनुभयो ।
प्रदेश विपद् व्यवस्थापन केन्द्रको बैठकले प्रदेश अस्पतलामा तत्काल एक सय बेड, दैलेख, कालीकोट, जाजरकोट, रुकुमपश्चिममा अक्सिजनसहित एक/एक सय बेड र अन्य जिल्लामा ५०/५० बेड तयार गर्ने गरी काम अघि बढाइएको छ ।
प्रदेश सरकारले अस्पतालमा भर्ना भएका बिरामीका लागि स्वस्थ र पौष्टिक खाना खर्चका लागि हुम्ला, मुगु र डोल्पाका लागि प्रतिदिन छ सय रुपैयाँ, कालीकोट र जुम्लाका लागि प्रति दिन पाँच सय रुपैयाँ र अन्य जिल्लाका बिरामीहरुका लागि प्रतिदिन चार सय रुपैयाँ खाना खर्च उपलब्ध गराउने भएको हो ।
प्रदेश विपद् व्यवस्थापन कोषमा ५० लाख रुपैयाँ आर्थिक मामिला तथा योजना मन्त्रालयको अर्थ विविध कोषबाट जम्मा गर्ने निणर्य गरीएको छ ।